飄下飄下

似明非明咁睇左霍金介紹相對論，最大的震撼是：原來時間同空間都只係相對，唔係絕對。即係話，原來時間會被質量和物質移動的速度影響而變快變慢。浪漫d講，原來「洞中方七日，地上已千年」既傳說某程度上係符合相對論既。

如果咁講，所有野都可以演變、扭曲，變幻原是永恆，咁真係乜野都係夢幻泡影，三千世界都可頃刻間化為微塵。

我地活響一個咁既世界，樣樣野原來都係飄下飄下，跟本無任何真正的重心可言既話，咁點樣自處？個世界又係點樣黎？如果我可以好絕對咁答到你既話，我已經去做左一個邪教既教主。

不過，正如霍金所講，如果我地可以搵到一條定律去解釋依個物理世界既所有事，也許這就是所謂「神」俾我地既一個重要啟示，俾我地以依條定律去安身立命。諗到依度，我諗起道家講既「道」，道生一，一生二，二生三萬物。不過道家的道，又唔單止係物理世界，而係物理同內心世界融為一體。

究竟個宇宙複雜d？定係心靈複雜d？如果《時間簡史》係一本嘗試述說物理世界本源和去向的經典中既經典既話。咁心靈上，那一本書有同等既地位呢？我知道《心經》係真的，但佢回答既問題太核心，一般人如我睇左之後都係有好多野睇唔明睇唔透。而除左《心經》之外，最近榜既都應該係《生命中不能承受的輕》或者《流浪者之歌》。

霍金又話如果將相對論同量子力學中既矛盾位調和互相補合形成一條定律，就應該搵到物理世界的真理。如果將依一條真理同心靈世界的一些道理融合，搵到真正的「道」，咁我地既人生又會唔會充實而安然呢？我真係好希望會係咁。飄下飄下又好，搵到一個絕對既重點都好，我諗人類世界有左依一條「道」，長遠黎講，應該會好唔同。因為，我們知道些是重要的事，或者知道所有事都係唔重要既時候，好多既不安同煩惱都會煙消雲散。但願我能活到那一天。

好鬼窮

唔想出街食野。能煮的話都盡量煮每一餐。

兩對鞋都著到個底穿窿先至買新的。$300買了兩對鞋。

用$20成本煮三餐（蛋、飯、菜、甘筍、蘋果、枝竹……）。

有日病左，但諗起要$150先可以拿醫生紙請假，所以都無請sick leave。

去咖啡館寫野睇書改為去公共兒童圖書館。

唔想去剪頭髮，要俾$140

要cut左份保險（其實份保險一開始買已經唔適合我，但幾年來都費事理，最近理先知浪費左咁多錢）

要去做兼職先儲到少少錢。其實要我慳錢唔係一個大問題，節儉是一種美德，是環保的事，但係儲唔到錢同埋同工不同酬先至係大問題。儲唔到錢就永無法投資滾大舊錢去做想做既事，也無辦法去進修，日日見住自己同人地做同一樣的工作但人工就少一倍真係好唔好受。所以，真係要的起心肝，搵一份人工同學歷相稱既工作。明明係可以掙多一倍人工既，點解唔去爭取？教書教到睇醫生都無錢睇，真係好似d血狗肥皂劇既內容，頂！

點解素食要咁貴？

最近在嘗試煮各種不同既素食，在街上亦去多左素食店食野。我發現多數既素食材料同素食館既飯菜都比吃葷的貴。有幾貴？例如一條素雞，好似一小條扎肉咁既野，就要賣成$15，$15可以去大昌買到4塊淹左既豬排啦喎。枝竹之類亦唔係平野，都要賣成十幾蚊半磅。而最貴既都係果d仿肉類食品。素餃子要成$20一包得十幾粒而素花枝丸就要$22得十粒八粒，真既都唔洗咁貴。而我同朋友響旺角一間素食館食左個素脆鱔（即係炸菇）同素金菇肥牛和一個荷葉飯，加埋茶芥竟然要$207。講緊既只係一間女人街入面裝修得同茶餐廳差唔多既素茶館喎。

素食絕對唔單止係一個宗教取向，其實素食除左免除食用動物在成長及被殺過程中既痛苦之外，實際上黎講，對環保極有幫助，因為食素可大量減少溫室汽體甲烷（其實甲烷比二氧化碳做成更嚴重的溫室效應）同減少食物鏈中能量損耗的情況。比起減排省電循環再用等方式更加能夠直接保護地球。但係點解一樣咁有意義既飲食方法佢既利潤要mark到咁高呢？點解全世界大多數既政府都唔推廣依樣野？

另外，素食店既東主其實究竟點睇素食依樣野呢？唔知佢地會唔會覺得經營依一項事業係有一種使命感呢？會唔會真心想推廣依樣野？

生命與生存

昨日心情非常差。通常我心情非常差既時候，就會睇d宏觀d既野，例如大乘佛法、宇宙起源、人類歷史、時間的原理之類既野去等自己個腦雲遊太虛，同自己講我在這浩浩宇宙和時間之流之中有幾咁渺小，以平衡一下自己既心境。而今次我睇左一套關於霍金暢談外星人既紀錄片《Into the Universe with Stephen Hawking-Aliens》。

好有趣的一套紀錄片，有興趣可以睇下。但我更有興趣響度講個節目給我對於生命與生存的啟發。霍金話要了解外星人，首先要了解我地地球既生命究竟點黎。係呢，生命究竟點黎？跟據一般科學性的講法，有兩個大可能性：一係在地球還是一片汪洋時，唔知點解d水份加上胺基酸加上一些物質和剛剛好的電量就變成左生命，生命的出現完全是因為長年累月積下來的偶然。一係生命是從殞石帶到地球然後不斷進化繁衍的。即係話我地的祖先跟本就係外星生物。無論點都好，所謂的生物，有一個最重要的原則，就是生存和傳承下去。這生存和傳承，不單止係個體既生存和傳承，而係整個同族同類既生存和傳承。如果要說生命的最終結任務，是這個了。你可能會話人類會有自毀或者捨生取義或者毀滅世界的念頭喎。自毀只係因自身不能抵受壓力而選擇被淘汰，捨生取義是以個人的犧牲去保障人類/同族的長遠發展，也是廣義的生存與傳承。至於有些人想毀滅世界，他們背後有各種不同既原因想咁做，但如果佢地的腦袋是正常運作的話，佢地唔係個人有一d好唔開心既經歷就係想歪了的極少數，基本上所有人即使唔想有下一代都想人類的生存繼續落去。

這種生物總想生存和傳承的執念，在最簡單的單細胞生物都實實在在的存在著。點解呢？我真係唔明，你明唔明？如果有神明的話，生物的存在和傳承或許真的有神的意旨。但如果一切只是偶然呢？那麼一切除了我們自身的思想和感覺，就甚麼都不是。一切都失卻任何意義？

點解我由細到大乜都要問個意義何在呢？這個執念，我一向都好唔理解。我以為意義總在宗教裡找得到。不過人大左，除左不認同基督/天主教外，其實佛教都不能認同（雖然我覺得心經和金剛經之類的東西非常有趣）。行雲流水，人生茫茫，除左減少眾生既痛苦，我真係領悟唔到生命的意義何在。這種事情，唔知外星人知唔知道呢？如果佢地答到我，我真係願意獻上我既一切去獲得依個答案。我始終覺得，生於在世上，不是只為左生存和存承咁簡單。諗到依d野，一些唔開心既事，的確被拋到九宵雲外了，好野~~

Eleven Kinds of Loneliness

我想推介Richard Yates這本書。

不過，個中文譯名我覺得怪怪地：《十一種孤獨》。Loneliness究竟點譯？我查過台灣的教育部重編國語辭典，但依然無答案。孤獨理應解作你身邊真係無人陪你既狀態，但書入面d人好多都唔係無朋友妻兒喎。如果譯做寂寞呢？噢，寂寞，我總覺得寂寞應該比較偏向心理上，而且是有種自覺性。但書入面d角色又係唔係真係覺得自己咁寂寞呢？又好似唔係。所以，我覺得書名中的loneliness還是無乜得譯。或許loneliness本身也不足夠去形容書中角色們的狀態。

咁本書係講乜野呢？我個人覺得佢係講城市人在於佢地既理想同現實之間那一條鴻溝，而往往因為我地既笨拙所以永遠都跨唔過。又或者，有d人幾歷左一d事情後跟本再無ground去講d乜野理想。嗯，佢講既係果種既敏感又笨拙或者笨拙卻又死扯著理想唔放既人。笨拙於人世間唔係一個問題，但係你既笨拙同埋敏感既心靈及理想纏繞不清，就注定你一生都得不到幸福。

唔好期望依一本係故事性豐富既書，入面無乜「大事」，無生離死別，無深刻情傷，無戰爭，無陰謀，無奇案，有架只係一d小人物既小事情。例如一個俾人排斥既小學生點解用謊話去搏取同學們既友誼、一個好勁抽好嚴格既軍校教官因為唔識擦鞋點樣俾人趕出自己既工作崗位、一個長期住院既肺炎病人佢既老婆響出面識左第二個但照樣keep住個個星期去醫院探佢、一個婚姻生活呆滯既老公有日響公司俾人取笑去酒吧溝女又溝唔到最後無無聊聊咁犯左單刑事案、一對關係唔平衡既朋友響法國康城頹hea、一個工作不行既男人響公司俾人炒左友諗住瞞住老婆一頭半個月但結果俾佢老婆套一套就講左出黎、一個成日諗住d騎呢創作計劃既的士司機點樣亂咁花自己既錢搞創作……依d故事聽落真係無乜閃光位，不過睇落每一篇唔多唔少都有自己既影子，睇落特別有共鳴。我一路睇一路暗忖自己很明白面對個人的種種笨拙加上現實環境對你既期許之間既矛盾，最後所謂既理想、都變成左一張張空頭支票。

成日都聽到人講：「有困難，咪解決佢囉！」有時我覺得就真係咁簡單，但有時又知道好多野要用時間同心力去解決。即使你真係付出得到個時間同心力，時移世易，個困難又會變左質，而且其他既困難同誘惑又會響唔知邊一忽鼠出黎欄住你既去路。笨拙既人，就往往響一個困難未解決到時就俾其十幾個另外既困難同誘惑圍住左。係囉，依本書就令我諗起依d野。

不過，依本書入面講既loneliness，同我地今時今日所面對既loneliness既本質又有d唔同。書入面講既係五十年代既紐約人，佢地都似乎有一個可說明既「理想」，一D鮮明既「美國夢」，例如想成為一個受歡迎既人、想有一段美好既婚姻、想做一個train up一班top soldiers的軍校教官、想成為一個偉大作家、想成為一個Pop Jazz的明星、想有滿足既性生活……而依D人都唔係頹hea喎，佢地都有try過但try極都係同理想相差十萬八千里，又有苦無處傾訴……但去到我地依家依個年代，問題已經唔係想做而做唔到，而係根本唔知做乜好，就好似d香港二線明星歌星返到大陸做電視show時果種茫然既神情一樣。究竟響度做乜野呢？無乜理想，無左果條達唔到理想既鴻溝，但係又生活得好唔實在安心，又唔係無人關心你無人同你傾，只不過傾唔傾都係咁，大家都係咁但又唔係好明對方既感受，做人做到好似一隻隨水漂流既水母咁，浮下沉下漫無目的又偏偏有個人腦，我諗依個就係我地今時今日最大既loneliness。

上網症的反思

最近看了以下的一篇報導：

http://dailynews.sina.com/bg/news/int/mingpao/20100609/14271515923.html

重點是有研究指出當我地無論用電腦還是手機無限上網時，久而久之，會產生以下三個負面影響：

1. 自戀

2. 容易焦躁不安

3. 集中力下降

我這年紀的人，即係MTV世代的人，已經被上一輩的人定性為集中力低耐性低的一代。原因是我地都係睇電視同MTV大。這個年代的鏡頭都轉得好快，而且五顏六色，所以睇到我果個年代的小朋友普遍都唔太鐘意睇書畫畫之類既靜態活動，再加上我地開始有機打，所以成日都掛住打機，個人更加反應快但係就好躁好不安，經常處於un腳狀態。

但起碼，睇電視點都要睇晒成個節目先會轉第二個（除非你轉台或唔睇），打機果時無得打online game所以始終會打到悶，沉迷極都有限。

但係上網依樣野真係堅勁，革命性的。尤其是寬頻普及之後，你鐘意上幾耐網都得，youtube你鐘意睇幾多有幾多，mp3、漫畫、影片、咸片、相片鐘意download幾多都得，無限咁多個forum，facebook、twitter、MSN你鐘意識幾多friends都得，幾多靚仔靚女都可以成為你既「friends」，隨時隨地都可以保持聯絡。

上網，依家真係好似王菲果首《光之翼》咁講：「在網絡上的海洋找不到，讓慾望躲藏的地方」。當然啦，上網好多慾望都滿足唔到，但各種唔同的慾望都在網上可以透過聲音畫面同文字某程度咁滿足到你。而且重點是差不多所有網上資源資訊都係無償、無限click則來click則去的。令我地產生左一個滿足既幻覺，令我地個腦不停出訊號要我地去睇依樣果樣，不斷咁click就不斷有唔同既野睇，而且仲要係你想睇既野，咁我地個腦咪越來越多要我地滿足慾望的訊號，佛家叫我地要盡量心無雜念先可以活在當下，但我地就偏偏濫用左上網依樣野令我地個腦越來越亂，搞到好多時放工放學之後成晚上網睇左既野俾你阿爺果輩成個月所睇既傾既還要多，但係第二日問返你上網睇下d乜做左d乜，又真係好迷惘。唔知道點解d時間hea得咁快又咁恍惚。D時間，過得好唔實在。

不過，我自己都係一個上網精，返工開住個MSN同明報網，放工回家長開部電腦MSN、download依樣果樣、睇下自己個xanga有無人睇再響youtube亂咁按咁就已經到左子夜時份。雖然去旅行或者唔響香港時我唔會特登去上網好似毒癮發作咁。但一返到家第一件事總係開腦上住網。就好似八九十年代一返到屋企就要開電視等間屋無咁虛咁。

如果你唔覺得你上網上得太多，遇到以上既問題既話，你可以唔再多諗。但如果你對以上果3種症狀都好有同感既話，你要諗既，先唔係點樣可以唔上咁多網，而係要諗唔上網既話，其實你可以做乜野。我諗我地上網90%以上既時候都係因為無聊。我地唔上網，就會唔無聊嗎？其實這個問題好有趣，我地做任何事其實都可以算做好無聊或者好有意思。例如落街個公園或者海邊行下、發下呆、同家人睇電視、煲下電話粥、睇下書、彈下結他畫下畫寫下野，全部野無唔無聊都係睇你既心態。如果你響這些事情入面搵到唔無聊既地方，我諗你就會上少d網。

之不過，我覺得上網最令人不能自拔既地方應該係果個同你認識既人connected的感覺。總是會覺得上住網開住msn就可以隨時同d朋友吹兩嘴，但要你打電話吹水嗎？要專心咁只係同一個人不停聽野講野，好花精力又唔係好願。開住facebook又會覺得我隨時睇到人地既八卦無聊野之餘又會睇到人地覆返自己既野，唔知點解好有滿足感，覺得有人注視緊你。依一種好似同寂寞拉遠左既感覺，總係比你做其他更有意思既事情還要吸引。因為好多好有意思既事情，佢既本質都係要你付出一定既精力同克服一定程度既寂寞感。

所以，講到底，你搵唔到一d有意思係其他野去做，又或者你付唔出精力、勁怕寂寞既話，我諗你在可見既將來都戒唔甩上網依樣野。而上網好多時就係會令你越來越唔想做任何離開個screen做其他花力氣的事情，同時亦會令你越黎越怕寂寞，真係勁過尼古丁。

是誰發明了生日？

係呢？究竟邊個發明生日？

點解要慶祝自己出生的日期？其實當初諗起要慶祝生日那個古人都對人生幾樂觀架喎。慶祝自己出生果日，即係話生存係值得慶賀的，對於我黎到依個世界，我覺得好開心，所以就要每年都記住依個日子。

如果人生真如佛家所說的「眾生皆苦」，如果出生本身就係一種消耗地球資源既行為，咁點解仲要慶祝？或者有時我地真係將自己放得太大，或者就係人生跟本就係充滿苦楚，所以我地要苦中作樂，搵生日依一日慶祝下諷刺下。又或者再懶偉大d講，生日係為左

其實生日對我黎講係一個兩難式，有一班人同我慶祝時，我會覺得好累的其實，要擺出一副好高興好感恩的樣子，但其實發呆才是我最舒適的狀態。但如果完全無人同我慶祝呢？我又會覺得有d失落。我係唔係俾全世界遺忘了？敏感而無處安放的心靈，that’s stupid。

生日，真係一個好奇怪的日子，慶祝又唔係，唔慶祝又好似缺失了些甚麼。就像聖誕節一樣，你唔知耶穌做過d乜野，甚至唔信耶穌有無存在過，但係都可以盡情狂歡唱K隊酒行上街唔知做乜玩到盡。其實好無聊唔知做乜，但唔玩下又好似損失左d乜野。

諗深一層，其實我地依家依一個世界，真係咁需要乜野意義嗎？好似大家都好似BB咁，開心就夠了，再諗深一層？好辛苦，點解要咁辛苦？唔諗唔諗就一世，諗到成個諗樣咁又係一世。反正都諗唔通，諗通左反而更加悲哀，諗黎做乜野？

講到底，生日都係俾個機會大家開開心心下又測試下你有幾受歡迎吧。生又點死又點，其實本質上都無乜分別。

 

P.S. 我放棄了用全白語文寫blog，皆因我想用最順暢的方式去表達我既思想，文字的正確性，其實毫不重要。你明就得。

我所做的我自己不明白

原本以為那位主任經常對著我黑面，一定是得罪了高層，加上工作無突出表現，九成會被炒的。怎料年度appraisal時老細讚多彈少，雖仍未能爭取到一個正式教席，加了那丁屎那麼多的人工，但沒有被炒，我已經深感意外。

反觀其他同事，約有1/3去年入職的同事都被抄了。聽說原因老細說出的原因只有一個：「你不夠主動。」換句話說，即使你沒有甚麼過錯，但基於你沒有精益求精，所以你就被out了。天啊，比商界更冷酷。

所以一位同事說，學校一方面不斷說要培養小孩的品德，做人要關顧別人，但另一方面對職員卻如斯殘酷，也如斯剝削（我的職位其實是教書的，但假期和福利連TA也不如，人工也高不過TA多少。），每年都要擔心下一年還有沒有得做，一覺得你不夠「精益求精」就被out。這樣的管理方式，算是關顧員工嗎？如果員工算是人的話。試問一個fresh grad的老師，第一年工作便沒能續約，而且appraisal老細只是跟你談了不夠5分鐘，就判了你的死刑，但明明你自覺沒做些甚麼的，事前也完全沒有warning。那打擊對他們來說究竟有多大？那可是人生第一年投入職場呢！不夠硬的，很可能從此信心盡失，一厥不振，從此在教育界浮浮沉沉始終未能再謀得教席，或者從此離開教育界在商界裡半死不活的打滾。從前做TA時，的確見過這樣的例子呢。

同事說不應繼續在這裡做，在這裡做就等於讚同本校的剝削和殘酷管理手法。為甚麼你可以去遊行反最低工資、平反六四、反歧視同志但就不能拿出勇氣去為自己切身的利益和教育界傲骨一次？他問難道你怕找不到工作嗎？我答是的。是啊，我不及你，我份人IQ不高，不懂擦鞋，經常心不在焉烏烏龍龍的，又未考基準試，而且天生樣子就像一個小朋友，見工很難有甚麼說服力。我這年真的用心去做，才勉強保得住個位。雖然這年在教學上的技巧是長進了不少。但這些在別校的interview裡人家會看得到嗎？而且，又要給家用，供保險，日常洗費，如果我有一個月以上無得撈，可真要找安信兄弟幫手。不過這麼多藉口，說到底都是我不夠guts，一種根深蒂固的軟弱。

我很愛我的工作，也很喜歡我的學生們。每天上班時，我期望見到他們，期望能夠教他們一些新智識，分享些有趣的事情，和大家打成一片。無奈是人工、福利和工作穩定性都如此不堪。點解，一個教席咁難求，仲難過行街執到張金牛？我校最近舉行左一場招聘會，收到幾百封求職信，有八十幾人黎interview，你估下幾百人爭幾多個位？其實是一個位都無，那場招聘會根本是假的，根本就沒有空缺。Demand and supply，真係失晒衡。

諗深一層，一個教職員究竟值幾多？我真係唔知。出面商界日日做到仆街十個鐘起碼同樣大學畢業做幾年野都係得果萬零蚊。教書係唔係真係值咁多？又有暑假和好多學生假放喎。所以又唔係一面倒老細錯晒，教改錯晒。只係，個世界唔同晒。又或者，人類既進步本來係為左全人類越來越幸福，但結果好多左都弄巧反拙，好像全球化、可計算的效率、商業化、資訊爆炸……

再諗深一層，我其實真要教書嗎？大學時滿以為自己將會是一個很有個性的感性作家。結果呢？寫過d乜野出黎？晚晚唔係上網上到十二點幾就係洗衫煮飯做運動飲whisky，星期六日就同朋友吃喝玩樂唔知做乜。畢左業五年啦，究竟做左d乜？痴能線的。最近跑步時發覺關節越來越鬆，照鏡時亦發現眼尾已隱約有點歲月的痕跡。Eason首《歲月如歌》原來已經係好多年前既歌…… 我依然唔知響度做乜。

有一日，當在我等巴士時，看到一張乜野教會棟篤笑音樂會的海報，超無聊。但張poster右下角有那麼一句福音的引言，我看罷只想好好的抽一口煙，或者隨便搵條燈柱狠狠咁踢幾腳。

「因 為 我 所 做 的 ， 我 自 己 不 明 白 ； 我 所 願 意 的 ， 我 並 不 做 ； 我 所 恨 惡 的 ， 我 倒 去 做 。」羅馬書7:15

我知道有d野，咁多年黎都係卡住左的，但我又講唔出係乜野……人生有時就係咁，明明係一件好靚既designer T，但只要響心口位唔覺意勾爛左個窿仔，就成件唔要得。即使你勉強咁著住，話穿窿先至係fashion，都只不過係自己呃自己，而且件衫越洗個窿就只會越大，點補都補唔返。

個結尾係要講d積極正面野既話，我想搵出卡住我果樣野，用蒜蓉同大火炒香佢，大啖大啖咁食落肚，然後大篤大篤咁屙出黎，就咁。

醉酒駕駛

四兩菜落錯了半斤。

該在咖哩裡落糖落錯了鹽。

枝竹都炒焦了。

菜有一半都是全生的。

煎蛋落油卻落錯了水。

心神恍惚時煮食，比醉酒駕駛更危險。本人史上煮得最差的一頓飯，地獄級，Damn it! 還煮了三餐的份量。

或許我在想為甚麼我從不拿相機去拍攝形狀和顏色趣怪的大便而深深的煩惱著。

小老味，諗得多，都係得個諗樣，無能夠解決任何野。

Yamaha Majesty 250，我來了，等我呀！

打擂台

 

果然不失所望，今年看過最有水準的港產片。看畢，我就是覺得這套片的感覺似曾相識。呀，我終於想起來了！

 

《柔道龍虎榜》

內容只有那麼一點點相似，但內裡的男人味和俠骨，同出一徹。兩套都是非常有意思的港產片，要支持一下啊。

界女

壞腦袋，總是色。